محبﷲ شوق

محبﷲ شوق

محب ﷲشوق د ضلع مردان مشھور علمی او ادبی کلی طوروکښې پہ کال ۱۹۵۱ ء کښې د

جنورۍ پہ شپږمہ نېټہ پہ یوې درنې کورنۍ کښې پېدا شو ۔ لیک لوست ئې د مردان

پہ سکولونو کالجونو کښې کړے دے ۔ د تعلیم د فراغت نہ ورستو پہ پی تی وی

پېښور کښې د پروډیوسر پہ طور ئې کار شروع کړو ۔ د محبﷲ شوق پہ نظم او نثر

دواړو باندې ښہ لاس بر دے ۔ پہ نثر کښې پہ تحقیق ، تنقید ،طنزومزاح ،

افسانہ او پہ ډرامہ ئې طبع ازمائی کړې دہ ۔ د طنزومزاح کالمونہ بہ ئې پہ

غنچہ او ورستو بہ ئې پہ امن کښې لیکل ۔ چې عنوان بہ ئې وۂ ھغہ دغہ ۔ د کال

۱۹۷۲ ء نہ تر ۱۹۷۶ئ پورې د اولسی ادبی ټولنې مردان ستر سېکتر پاتې شوے دے ۔

پہ کال ۱۹۷۹ء کښې محبﷲ شوق تہ د رېډیائی ډرامو پہ جشن کښې د بہترین ډرامہ

نګار انعام ورکړے شو ۔ د رېدیو پېښور مشھور د ټوکو ټکالو پروګرام “پلوشې “

بہ محبﷲ شوق لیکۂ ۔ د پښتو شمېریزہ ئې پہ نوی ډول جوړہ کړې دہ ۔ د محبﷲ شوق

شعری مجموعہ “ ستا د دیدن پہ لار “ او نثری مجموعہ پہ شګو کښې لار دي ۔ د

غزل موضوع ئې رومان دے ۔ غزل ئې پہ ھغہ روایتی ډګر روان دے ۔ خو د سخن فہمۍ

تقاضا کوی پہ ملک کښې د رڼا او خوشحالۍ ارزومند دے ۔ خبرہ پہ اشارہ کنایہ

کښې کوی ۔

حسن مجبور دے خواږۂ نیشتے د لېمو کلی تہ

آخر دا کلے بہ پرېږدو د مجبورو کلی تہ

ما فاصلې د خپل اخلاص ستا د یادونو کچ کړې

یقین مې نۂ ځی نور د مینې د رشتو کلی تہ

ھغہ ښائست ، ھغہ ژوندون ھغہ سکون یادېږی

ما پہ خپل ژوند کښې لږ شان بوځئ د سپرلو کلی تہ

زۂ خپلو ماتو حوصلو ھم لار کښې نۂ پرېښودم

رقیب ورکولې کۂ پشتې د حادثو کلی تہ

ډوبیږی ساہ ، مینہ بې حسہ شوہ ښائست بې نورہ

رڼا تہ غږ اوکړئ چې راشی د تیارو کلی تہ

ارمان مې ستا د چم قیصہ دہ نور څۂ نۂ غواړمہ

لږہ منزل تہ مې اسرہ دہ نور څۂ نۂ غواړمہ

وفا دې واخلی بدنېتی دې د رقیب شی نصیب

ما لہ دا خپلہ مینہ ښہ دہ نور څۂ نۂ غواړمہ

زما ھډونہ دې شونټۍ کړی خو رڼا دې راشی

پہ ما دغم تیارۂ خورہ دہ نور څۂ نۂ غواړمہ

لکہ سپرلی غوندې راتېر شہ او ما ګل کہ اشنا

ژوند ستا پہ لارہ کښې ډیوہ دہ نورڅۂ نۂ غواړمہ

ما لټولو مسکی توب د زلمی توب پہ شونډو

ھغہ وې غم رالہ توښہ دہ نور څۂ نۂ غواړمہ

زما پہ چم کښې دې مسکۍ شې ښاپېرۍ د جمال

زړۂ کښې د عمر تلوسہ دہ نور څۂ نۂ غواړمہ