د ويب سائټ په باره کښې

ما pushto.net په دې ساده سوچ شروع کړے دے: غواړم چې د پښتو شعرونه په انټرنېټ کښې په اسانه پيدا شي او خلق ئې ولولي. ډېر شعرونه اوس هم په کتابونو، زړو ويب سائټونو، رېکارډنګونو او د خلکو سره پراته دي. کله کله شعر پيدا شي، خو دا نه وي معلومه چې له کوم ځائ نه راغلے دے او د هغه شاعر نور شعرونه چرته دي.

زه په دې ويب سائټ کښې هغه شعرونه او معلومات په يو ځائ راټولوم چې خواره واره دي. دا کار ورو ورو کوم. کوشش مې دا دے چې شعرونه په سمه بڼه خپاره کړم، دا هم وليکم چې د کوم کتاب يا ځائ نه مې رااخيستي دي، او د شاعرانو په حقله اسانه معلومات وليکم. غواړم چې د پښتو او انګرېزۍ لوستونکي دواړه ترې فائده واخلي.

هيله مې دا ده چې څوک خپل خوښ شعر دلته بيا ولولي، نوے شاعر وپېژني، يا لږ وخت د پښتو سره تېر کړي. دا ويب سائټ لا پوره نه دے او غلطۍ به پکښې هم وي. که کومه غلطي ووينئ، ښه کتاب يا بله حواله درسره وي، يا څه مشوره لرئ، ما ته ئې وليکئ.