ادم

عجيبه مې وجود لاعجب مې ځيگر

څۀ بې توکه بې توله دا سترگې اؤ سر

يا په بام د حرم د مستۍ ترانه

يا په شپه د وصال د نفلونو بهانه

يا موسی ته قيصې د فرعون د محل

يا فرعون ته بيان د ابد د اجل

يا د غم د بی بی نه سرور غوښتل

بُت خانه کښې پړقونه د طور غوښتل

کله روح د مجنون او ساقی اؤ پياله

کله سر د خيام او ژړا اؤ صحرا

کله خوب دمنصور د رڼا د وصال

کله شوق د حبشی د کوکۍ اؤ د خيال

کله ډوب بې پايانه کوهے د غم

کله هره پياله کښې صنم صنم

يا د ژوند ککو کښې د مرگ تصوير

يا د مرگ سلگو کښې دژوند تعبير

يا پېغام د فراق په خندا کښې د يار

يا اميد د وصال په ژړا کښې د يار

يا دجېل کوټگۍ کښې خوبونه د کور

اؤ ايروکښې ارمان د رڼا اؤ د اور

دا بېخوده دماغ بې کماله وجود

پُجاری د مندر اؤ شوق د درود

هم غلام د ښايست هم مريےئ د وفا

هم درياب د تيرې هم مستی اؤ رڼا

بې ارامه ارمان بې قراره نظر

څۀ بې توکه بې توله دا سترگې اؤ سر