ارنی

ځان له څۀ بانه زۀ د بيگا اؤ سبا گورمه

خاؤرو کښې دې گل له د گلونو دُنيا گورمه

سترگې مې لټئ چرته صحرا کښې مُناره يوه

شونډې مې لټئ دُعا له ښکلې ننداره يوه

گرځم ماښامی کښې د زهری، هلال شغلې لټوم

زۀ د شبنم څاڅکی له خپلوی اؤ سلسلې لټوم

ځان له بهانه د خندا، وجه د ارمان لټوم

شپې له د سبا زيرے اؤ مينې له جانان لټوم

ځکه کله گل کله سپرلی کله هلال له ځم

پورې ترې رڼا لټوم په وازو سترگو جال له ځم

کله د درياب، کله کومه د خيام تپوس

کړمه د غمونو، تلوسو نه د ارام تپوس

ځان له څۀ معنی زۀ د بيگا اؤ سبا گورمه

خاؤرو کښې دې گل له د گلونو دُنيا گورمه

ربه! زۀ ژوندون له اؤ مرگی له يارانه گورم

دې لېونی سر له د منلو افسانه گورم

ځان له بهانه زۀ د بيگا اؤ سبا گورمه

خاؤرو کښې دې گل له د گلونو دُنيا گورمه