بې وفا

حسن حسن لټومه

کۀ په غر وی کۀ په سمه

زۀ په مينه مينه پايم

بې د مينې مرمه مرمه

بې وفا کۀ د جانان يم

بې وفا نۀ يم د مينې

چرته رنگ ځان له لټومه

چې پرې سترگې کړم رنگينې

چې يوخم د ميو تش شی

تش ټيکرے شی بې روحه

بلې ډکې مېخانې له

سينه يوسمه مجروحه

تش کړے څټلے نۀ شم

چې خوند نۀ وی د کبابو

زۀ مئين په پياله نۀ يم

زۀ مئين يم په شرابو

پتنگ نۀ څټی مومونه

چې د شمعې رڼا نه وی

تورانۍ نۀ وئ سندرې

چې مستی د سبا نۀ وی

بې وفا کۀ د يو يار يم

وفادار د مينې يمه

حسن حسن لټومه

کۀ په غر وی کۀ په سمه