خمبيره

هره خمبيره کښې يو خوا اور بلخوا اوبۀ وی

من کۀ په کښې بد وی نو دوه منه په کښې ښۀ وی

يو خوا ته کۀ دام دی د ښکاری اوږی نظر دی

خوا کښې ئې د مينې او وفا گلاب پراتۀ دی

يو خوا کۀ بهار دی سرۀ گلونه دی مستی ده

چارچاپيره گوره اسويلی ساړۀ ساړۀ دی

ورکه ماشوړه ده نۀ ئې سر نۀ ئې لکۍ شته

ژوند کۀ ئې منطق دی ټول بحثونه ئې کاږۀ دی

بدو کښې ښۀ پټ وی اؤ په پښو کښې رنگ د بدو

دا د خرو متل دی چې بد، بد وی او ښۀ، ښۀ وی

تۀ چې هر ادم د ژوندون يومعيار له راولې

خاوره به ترې جوړه کړې، خُمار او رنگ به خاورې شی

ژوند يو جدا والی، بدلېدۀ اؤ خورېدۀ دی

نوی د تلو لار، نوی نظر، نوی ليدۀ دی