ښځې

چا له شراب ورکړی، چا له سرې وينې د جام

چا له خربانو د پاره، چا له گل اندام

څوک په اديله باندې پری د ماچين واخلی

څوک په چواړئ پسې دُنيا کاندی تمامه

چا له ښه څربه، خوږه، بوجئ لکه د گوړې

چا له يخه پخه شېخ ړوکئ د اوبو مړې

چا له د لولکې په شان چُسته اؤ رنگينه

چا له د گونگټې په شان توره اؤ مهينه

چا له قتقتئ کوکارئ کړوکه زړه چرگه

چا له غونډه مونډه، مسته ، تکه سپينه گرگه

چا له داسې ستغه لکه اوچه بکياڼه

چا له ډوبه مسته لکه نوې دوک بياڼه

چا کره صابره کور ودانه درنه ميښه

چا کره سيمه کوترئ په هر چا چې شوه پيښه

چا کره چلی، د چلې لور لوړه ، بده، مکاره

چا کره کمتره چې هم ښځه وی هم ياره

چا له زړه خره، بې خونده، بې نوره، پواړه

چا ته لکه سروه د خندا ډکه ولاړه

چا له ښه ترسکونه ، چا له ښه خوږه حلوا

يو له د نيمبو اچار اؤ بل له مربه

يو له خمبيره ډوډئ پړسمنه، پسته، نرمه

بل له د مسورو پيتی گرمه، گرمه، گرمه

ورکړۀ د قسمت دی چا له ډيره چا له کمه

خدائ دې هغه در کړی چې وی ستا په شونډو سمه