ساخت

عقل خو دوه گامه لاړ شی

اخوا ته روک اؤ حېرانه شی

حُسن کښې هغه دليل دے ستا

سترگې دزړۀ پې روښانه شی

چرته ئې، څنگه ئې، کوم ځاې ئې

دلته خبره دې ورانه شی

نوره چې هر څومره گرانه شی

رو، رو په فکر اسانه شی

عقل، دليل اؤ سوچ اؤ خيال

پوخ د يقين حصار جوړئ

سپينې، خوږې د اُميد اوبۀ

ژوند له گلونو کښې لار جوړئ

هر شی کښې ساخت اؤ تول اؤ شمار

شکل اؤ رنگ اؤ زور اؤ کار

لاس د استاذ صفا ښکاره

هره ذره د جهان کښې دے

هر شے يو تول کښې گنډلے دے

جوړ اؤ په سوچ جوړ شوے دے

ستوری اؤ نمر اؤ رڼا اؤ هوا

هر يو ئې لاس کښې نيولے دے

دغه د عقل اؤ تول سفر

چل اؤ منطق اؤ زېر اؤ زور

اؤ هسې کۀ ځان ته مم مم وائې

نو هغه گنبد اؤ دغه ممبر

خيال اؤ جمال اؤ دلدار اؤ خُمار

ورانه دُنيا پرې ودانه شی

عقل يو حد اؤ تول کښې گېر

اخوا ته ورک شی حېرانه شی