ساقی

د ساقی لاس کښې شراب دی، دخندا دی کۀ د غم دی

چې د سوز او کۀ د ساز دی، د مستۍ کۀ دماتم دی

ساقی سترگې مهربانې خورې کړې په ستم دی

د ساقی شونډو مدهوشو کښې خيالونه دکرم دی

دا تپوس زما نه مۀ کوه ، چې دا ډېر دی او کۀ کم دی

دا نشه هم د صنم ده، دا شراب هم صنم دی

مېخانه هم دصنم ده، مستانه هم دصنم دی

زۀ ئې څکمه ستا په نوم، د جمدون کۀ د عدم دی

جام په سر، سر په سجده يم، يو قطره د خُمار غواړم

د دلدار وصال به کيږی، زۀ تش خيال د دلدار غواړم