ژوند آهنګ د ژوند نغمه بدلوي

ژوند آهنګ د ژوند نغمه بدلوي

حالات بدلېږي زمانه بدلوي

څوک چې په ژوند کې څه بدلون غواړي

اول به خپله رویه بدلوي

وخت چې بدل شي نظریه نوې شي

ژوند چې بدلېږي فلسفه بدلوي

په یوه منډه بدلېدونکې دنیا

د زندګۍ هره رشته بدلوي

مونږ لا په ځمکه د شپې ځای نه مومو

خلک سپوږمۍ ته ځي نشه بدلوي

اوس خو تیارې هم د رڼا د وېرې

هره شپه نوې لوپټه بدلوي

هر څوک د خپل ساقي له نومه ستړي

هر سړی خپله میخانه بدلوي

جانان یې هغه، انتظار یې هغه

صابر د مینې طریقه بدلوي