شاندانه (زما لور)

اوه يوه ذره د نور وه شوه درياب کښې دښېست ډوبه

په خوبونو دځوانۍ کښې يو شغله د نُور پيلئې

دا نرۍ د هلال شونډې، دا د دوو ستورو رڼا ده

دا د هغه خوب تعبير دے چې وۀ ما اؤ تا ليدلے

دا هم زۀ يمه هم تۀ ئې، هم زما اؤ ستا خوبونه

دا هم گل دے هم بور دا دے، هم سازونه د بلبلې

دا چې ستا نيازبينو گوتو د ازل څانگې ته لاس کړو

دا گلاب ئې ترې راواخست په نورونو لمبيدلے

دا چې زۀ په پټو سترگو دمستۍ درياب کښې ډوب شوم

دا مې لال تا له دلبرې! دتيارو راخيژؤلے

دا چې ما غمگينې سترگې، په ژړا کړې بره پورته

دا زما د غم جواب کښې سپوږمۍ گل دے راليږلے

دا اوبۀ د دوو چينو دی، د درياب په طمع درومی

ربه جوړ ترې اباسين کړې، په گلونو کښې بېدلے