څومره؟

څومره مينه مستی درکړم، ادب څومره؟

څومره تا دلدار جانان کړمه، رب څومره؟

نۀ زۀ ستا په حد د ځان په حساب پوه شوم

ستار پوهېږی په خپل هنگ اؤ طرب څومره؟

تورانۍ په ساز، سرود ترکومې رسی؟

گلاب پوه دے د خايشت په مطلب څومره؟

دا سپوږمۍ چې کُل جهان حېران حېران کړی

دا پوهېږی د خپل نُور په سبب څومره؟

رنگ رڼا د خپل ځيگر پرې خورؤمه

دومره خېشت وی چې زما وی طلب څومره

دا چې سرې شونډې ئې اور، سرور روښان کړی

معشوق پوهېږی د عاشق په مطلب څومره؟

ځما مينه د ادب د پنجرې ووځی

وايه څومره دې جانان کړمه، رب څومره؟