سوال جواب د لېونی اؤ ملا

لېونيه! مکه څۀ ده؟

ملا ! کور د يؤ عاشق دے

کوټڼۍ دې گڼې ډېرې

د همه ؤ رب خالق دے

لېونيه! ايمان څۀ دے؟

مُلا دا دے پوخ گمان

د يو خوب په زړۀ ليدۀ دی

د وصلونو د جانان

لېونيه! جنت څۀ دے؟

مُلا ! ستا جنت پيتی ده

اؤ زما جنت وصال دے

يو خُمار يوه مستی ده

لېونيه! حوره څۀ ده؟

ملا ! لهر د خُمار دے

يوه کرښه د شفق ده

د خندا بړبوړکۍ ده

لېونيه! نشه څۀ ده؟

مُلا ! دا په سېل واتۀ دی

د مستۍ رنگين محل کښې

دا واتۀ ننواتۀ دی

لېونيه! چې مونځ څۀ دے؟

مُلا! خاؤرې ښکلول دی

د جانان کوڅې ته تلل دی

د اُميد ارمان کېدل دی

لېونيه! سجده څۀ ده؟

مُلا! ځان خاؤرې کؤل دی

د مستۍ د گلو هار

د يار پښو کښې اچول دی

لېونيه! ژوندون څۀ دے؟

مُلا! زۀ يمه ژوندون

دا زما د خوب ليدۀ دی

د سبا اؤ د پرون

لېونيه! وصال څۀ دے؟

مُلا! ښېست کښې ډوبېدۀ دی

دا په ستورو گډېدۀ دی

په سپوږمۍ کښې خورېدۀ دی

لېونيه! حسن څۀ دے؟

مُلا! لهر د خُمار دے

يؤ موسکے موسکے شان خيال دے

يو نرے د رڼا تار دے

لېونيه! تۀ ئې څوک

مُلا! زۀ د چا ارمان

زۀ يو گل د چا د گوتو

پروت په پښو کښې د جانان