تش جام

هغه څۀ ساقی وی

چې ئې تش شراب وی جام کښې

نۀ ورکئی خُمار د سترگو!

رنگ د سرو لبانو

دا د دوزخ اور وی

چې تش سوے وی رڼا نۀ وی

دا هغه کافر دے

چې خطبې لولی ماښام کښې

دا د ازغو جاړه د گلاب

خو گلاب نه لری

دا لوگو وهلے سيخ

تيکه او کباب نۀ لری

زهر، زهر، زهر دی

شراب چې خُمار نه لری

کفر ، کفر کفر ده

مستی چې قرار نه لری

څۀ هغه بنده وی

چې جنون او دلدار نه لری

هغه د څۀ سيند وی

چې غولۍ او ابشار نۀ لری

هغه څۀ مومن وی

چې مستی دکافر نۀ لری

څۀ وی هغه سترگې

چې د مينې نظر نۀ لری

هغه دعا څۀ وی

چې شړنگا او شڼا نۀ لری

زهر، زهر ، زهر دی

شراب چې خُمار نه لری