نظم
يو جام
Ghani Khanمستانه ساقي راشه
يو جام جام راؤړه
مُسکۍ شه په خندا شه
يو جام جام راؤړه
پياله کيږده شيرينه، ځوانی د ځوانئ وينه
رنگ رنگ مستی رنگينه، حسينه، نازينه
مجنون يمه لېلی شه
يو جام جام راؤړه
يؤ گل يم رژيدلے، يؤ باغ يم سوځيدلے
يؤ ساز د ژړا يم، يؤ اه د بلبلې
ژوندون شه زما سا شه
يو جام جام راؤړه
گل فامه ساقی راشه
يو جام جام راؤړه
يؤ راگ يمه خاموشه، نغمه يم فراموشه
ځوانی مې په غم بېله، مستی راؤړه بې هوشه
د درد دارو زما شه
يو جام جام راؤړه
مُسکۍ شه په خندا شه
يو جام جام راؤړه
مست مست راکړه خوبونه، چې پټ کړم پرې غمونه
شروع کړه د ژوند تال ته، نازک د ښېست سرونه
دلبر شه، دلربا شه
يو جام جام راؤړه