ووايه جانانه

نوم د مينې خوږ وی کۀ پښتو کۀ عربۍ کښې وی

مادر، مورکښې چل نئی، چل په مينه د ابۍ کښې وی

څۀ چې ورته وائې خو خواږه په ځلوبۍ کښې وی

ټکے د وفا خوږ د دنيا په ژبو واړو کښې

يو رنگې اوبۀ دی ددې سيند په دواړو غاړو کښې

څومره چې خودونه دی، نو دومره ورته لارې دی

يو خوا غورځنگونه اؤ مستی، بلخوا قلارې دی

چرته غرونه، کندې، چرته ښې خشته اوارې دی

يو وريت په صحرا کښې، يو مسکے د چمن غاړو کښې

ووايه جانانه، فرق څۀ شو په دې دواړو کښې؟

ورک که ملاجان په مُنارو کښې ما په جاړو کښې

ووايه جانانه، فرق څۀ شو په دې دواړو کښې؟

يو ورته حبيب وائی اؤ بل ورته جانان

يو وئی درنه ځار شم اؤ بل وائی در قربان

يو وائی زۀ دې شمع بل وئی زۀ دې چراغان

يو دې په ځنگل کښې لټئی، يو دې لټئی شاړو کښې

ووايه جانانه فرق څۀ شو په دې دواړو کښې؟

يو ئې په شرنگا کښې لټئی بل ئې په غمونو کښې

يو ئې په جُمات کښې گوری، بل ئې په گلونو کښې

څوک ئې د ساز سر کښې لټئی، څوک په اياتونو کښې

روک چا مُنارو کښې کړو چا روک کړلو په شاړو کښې

ووايه جانانه فرق څۀ شو په دې دواړو کښې؟