اشنا له ډېره رشکه عنادونه پيدا کېږي

اشنا له ډېره رشکه عنادونه پيدا کېږي

پيدا چې يو عناد شي فسادونه پيدا کېږي

هر څو که يادوم دې هېروې مې هومره هومره

تا څو که هېروم ترې نه يادونه پيدا کېږي

الفت مې نوی ژوند ومومي ستا له هره عذره

څو ستا له بهانو که ميعادونه پيدا کېږي

ناڅاپه چې ښايست په کوم عمل کې جلوه گر شي

اختيار د زړه نه پورته شي دادونه پيدا کېږي

گرمۍ د بېلتانه مې غم افزون کړ اسوېلي کړم

ورېځ د اوړي راشي ترې بادونه پيدا کېږي

ياري لکه د دين ده پکې لار د عقل نشته

د عقل او خر د نه الحادونه پيدا کېږي

خاموش يمه خو چرته مې قابو د عشق په ژبه

ځوانۍ چې خاورې کېږي رودادونه پيدا کېږي

جذبه د شهادت له ربه غواړم که يې راکه

کثرت همه کافر دی جهادونه پيدا کېږي

حمزه! د خاموشۍ سره نسبت د يار د خوی دی

د شپې په خاموشۍ کې فريادونه پيدا کېږي