بې حسابه  څاڅکي توی په بحرو بر شي

له لکونو کروړونو یو ګو هر شي

رنګ په رنګ ګلان پیداشي غرو رغو کې

پکې یو نیم دلیلا دپیکي  ته ور شي

مرغلرې ډیرې وځي له دریابه

ځینې ځینې ښکلو پیغلو ته زیور شي

په عمرو اورونه  بل په یوه ځای وي

څو پیدا په  سرو لمبو کې سمندر شي

عالمونه پیداکیږي  بې حسابه

په دنیا کې دڅو تنو تاج په سرشي

میندی راوړي ډیر  زامن ډیر اولادونه

یو یا دوه یې  افلاطون او سکندر شي

جودانې قدر یو لعل پکې پیداشي

نور همه واړه دتورو کاڼو غرشي

په هر سره رنګ  سرخرويي نه شي حاصله

هسې  نه چې په رنګ سور شي نو سره زرشي

یوه کور کې پیداکیږي اولوئيږي

یو ئې ګوره ابراهیم اوبل ئې آذرشي

فرعونان دخدايي دعوې اغاز کړې

یو ماشوم دخدای له لوري مقررشي

چې طلسم کاندي  مات دسرکشانو

ډیر بتان  بت پرستان زیر و زبر شي

کاهنان یې دراتګ خوبونه ویني

ظالمانو ته پیدا دسر خطرشي

لا پیدا په جهان نه وي نه یې نوم وي

زلزله ګده په کور  دستمګر شي

لوی جهاد له معصیت سره شروع کړي

په دنیا کې غرق فرعون هم یې لښکر شي

څوک چې حق اوحقیقت پالي دنیا کې

یوه وخت کې وي موسی  بل وخت عمر شي

داسلام دطوفاني بیړۍ دپاره

لکه نوح لوی کشتیبان قوي لنګر شي

دخلقت له کار خانې نه کله کله

په جهان پیدا یو بل شانې بشر شي

چې رڼا یې په ملکونو کې خپریږي

ټول عالم  لره څرګند ه لکه لمر شي

دکونړ دلوړو غرونو په لمن کې

نابغه فرزند پیدا  دسید سفدر شي

پښتنه مور هسې زوی واخلي په غیږکې

چې ددهر او جهان  نامي پسر شي

ډیر پوهان ورته سرټيټ په شاګردی کړي

ډیر شاهان  یې په تعظیم مخې ته ورشي

همیشه یې قدر کیږي  په عالم کې

څوک چې  لوی په علم  وفضل او هنر شي

هسی نوم هسی  نشان ئې شي په برخه

چې لوی فخر دملت  او خپل ټبر شي

په شاهي  لویو قصرو کې  نه ځائيږي

لوی کور غواړي چې  اوار دده بستر شي

ټول جهان  ورباندې تنګ شي له نا کامه

اواره  لکه نسیم  په بحرو بر شي

ترکیه ، مصرو لندن ، فارس و پاریس کې

ارام نه مومي هر لور ته یې سفر شي

سرګردان وي  په جهان  هغه مړونه

چې د ټول جهان غمونه  یې په سر شي

سر یې مه بوله بل نوم ور لره بویه

چې  پیدا پکې لوی فکر  لکه غر شي

نه دی مړ  لوی پهلوان ددې جهان دی

هغه څوک چې  ځمکې تل نه رابهر شي

قیامت نه وي سر راپورته کړي له  خاورو

راروان په لور  دخپل اصلي مقر شي

په رښتیا چې  حق  په خپل  ځای قرار مومي

دپښتون سید  ارام په خپل  بستر شي

دې تابوت کې دپښتون ډیر خاطرات دي

چې یې ګورم بل  عالم مې په نظر شي

څوک چې وریې شي مزار ته که بینا وي

ورته بیرته به دپوهې لوی دفتر شي

ددې خاورو دورنما ته نظر بویه

که دې کله په دې لار باندې ګذر شي

ښکاره کیږي کار نامې  ډیرې نامدارې

ستر ګور ته آیینه دسکندر شي

لوی عظمت ، شانو شوکت راځي خاطر ته

لوړ فکرونه ، لوړ خیالونه  مصور شي

په یوه موټی سپیرو خاورو کې ګوره

دتمام جهان بهار  پټ او مضمر شي

هسې شانې  هنګامې  شي پکې غلی

چې غوغا ورځنې جوړه په محشر شي

لوی داستان، لویه قصه لري په زړه کې

که ددی خاورې له حاله څوک خبرشي

پښتانه به ورنه اخلي الهامونه

تیر دَورونه  به ئې مخکې لروبر شي

دی زیارت کې وینم بل راز تا ثیرونه

دلته مه کوی واړه واړه سوالونه