سيد جمال الدين

بې حسابه څاڅکی توی په بحر و بر شي

له لکونو کروړونو يو گوهر شي

رنگ په رنگ گلان پيدا شي غرو رغو کې

پکې يو نيم د ليلی پېکی ته ورشي

مرغلرې ډېرې وځي له دريابه

ځينی ځينې ښکلو پېغلو ته زېور شي

په عمر واورونه بل په يوه ځای وي

څو پيدا په سرو لمبو کې سمندر شي

عالمونه پيدا کيږي بې حسابه

په دنيا کښې د څو تنو تاج په سر شي

ميندی راوړی ډېر زامن ډېر اولادونه

يو يادوه يې افلاطون او سکندر شي

جودانې قدريو لعل پکې پيدا شي

نور همه واړه د تورو کاڼو غر شي

په هر سره رنگ سرخرويي نه شي حاصله

هسې نه چې په رنگ سور شي نو سره زر شي

يوه کور کې پيدا کېږي او لوئېږي

يويې گوره ابراهيم بل يې آذر شي

فرعونان د خدايی دعوې آغاز کړې

يو ماشوم دخدای له لوری مقرر شي

چې طلسم کاندی مات د سرکشانو

ډېر بتان بت پرستان زېر و زبر شي

کاهنان يې د راتگ خوبونه ويني

ظالمانو ته پيدا د سرخطر شي

لا پيدا په جهان نه وي نه يې نوم وي

زلزله گډه په کور د ستمگر شي

لوی جهاد له معصيت سره شروع کړي

په دنيا کې غرق فرعون هم يې لښکر شي

څوک چې حق او حقيقت پالي دنيا کې

يوه وخت کې وي موسی بل وخت عمر شي

د اسلام د طوفاني بېړۍ د پاره

لکه نوح لوی کشتيبان قوي لنگر شي

د حلقت له کارخانې نه کله کله

په جهان پيدا يو بل شانې بشر شي

چې رڼا يې په ملکونو کې خپرېږي

ټول عالم لره څرگنده لکه لمرشي

د کونړ د لوړو غرونو په لمن کې

نابغه فرزند پيدا د سيد صفدر شي

پښتنه مور هسې زوی واخلي په غېږ کې

چې د د هر او جهان نامي پسر شي

ډېر پوهان ورته سرټيټ په شاگردی کړي

ډېر شاهان يې په تعظيم مخې ته ورشي

همېشه يې قدرکېږي په عالم کې

څوک چې لوی په علم و فضل او هنر شي

هسې نوم هسې نشان يې شي په برخه

چی لوی فخر د ملت او خپل ټبر شي

په شاهي لويو قصرو کې نه ځائېږی

لوی کور غواړي چې اوار دده بستر شي

ټول جهان ورباندې تنگ شي له ناکامه

اواره لکه نسيم په بخروبر شي

ترکيه مصرو لندن فارس و پاريس کې

ارام نه مومي هر لور ته يې سفر شي

سرگردان وي په جهان هغه مړونه

چې دټول عالم غمونه يې په سر شي

سر يې مه بوله بل نوم ورلره بويه

چې پيدا پکې لوی فکر لکه غر شي

نه دی مړ لوی پهلوان ددې جهان دی

هغه څوک چې مخکې تل نه رابهر شي

قيامت نه وي سر راپورته کړي له خاورو

را روان په لور دخپل اصلي مقر شي

په رښتيا چې حق پخپل ځای قرار مومی

د پښتون سيد ارام پخپل بستر شي

دې تابوت کې دپښتون ډېر خاطرات دي

چې يې گورم بل عالم مې په نظر شي

څوک چې ور يې شي مزار ته که بينا وي

ورته بېرته به د پوهې لوی دفتر شي

ددې خاورو دور نما ته نظر بويه

که دې کله په دې لار باندې گذر شي

ښکاره کېږي کارنامې ډېرې نامدارې

ستر گورته آئينه د سکندر شي

لوی عظمت، شان و شوکت راځي خاطر ته

لوړ فکرونه، لوړ خيالونه مصور شي

په يوه موټی سپېرو خاورو کې گوره

د تمام جهان بهار پټ او مضمر شي

هسې شانې هنگامې شي پکې غلی

چې غوغا ورځنې جوړه په محشر شي

لوی داستان لويه قصه لري په زړه کې

که ددې خاورې له حاله څوک خبر شي

پښتانه به ورنه اخلي الهامونه

تېر دورونه به يې مخکې لروبر شي

دی زيارت کې وينم بل راز تاثيرونه

دلته مه کوی واړه واړه سوالونه