خوشحال خټک

د ادب او شعر لويه قهرمانه

د مغلو په کور تندر د آسمانه

د وطن د ازادۍ سختو جگړو کې

له هر چانه زړورمرد ميدانه

ستا د شعر مصرع لا ډېره تېره ده

بې ننگی ټوټې ټوټې ستا له بيانه

وې درزم او د بزم په مجلس کې

هلته باز دلته بلبل هزار داستانه

عشق او ذوق فکر و تدبير اراده عزم

ستا په برخه رسېدلی وو بېشانه

هم رستم هم فردوسی ديو داستان يې

هم شاعر هم مفکر هم پهلوان يې

قصيدې لرې غراله هره بابه

ننگ غيرت اخلي فتوا ستا له کتابه

د خبروکورودان ستا په بيان شو

خدای در کړې ده وينا ډېره جذابه

که جگړه کې استوار لکه يو غر وې

د عشق کار کې وې له هرچانه بېتابه

پښتونواله ستا پېغام ستا فلسفه ده

تا پرې نښوده پښتو چې شي خرابه

ستا په زړه مټ او بازو کې لوی قوت ؤ

ستا په لاس کې توره هېڅ نشوه بې آبه

تا د ننگ سبق پښتون ته دی ورکړی

د خودۍ په فلسفه دې خبر کړی

دا جهان ستاپه نظر کې نام و ننگ ؤ

چې بې ننگه ؤ هغه درته بدرنگ ؤ

بل څوک نه ؤ همداته وې ننگياليه

چې دې داغ په خاطر ايښی د اورنگ ؤ

ډېرې لويې دعوې تا سره وې زړه کې

په مغلو باندې ځکه ستا غورځنگ ؤ

هغه باز وې چې لوی ښکار دی اؤ نظر کې

د وطن په سيمه پوله به دې جنگ ؤ

هم دې توره له چا نه وه ځلانده

هم دې هر چانه لوی عزم او فرهنگ ؤ

په دا خپله لويه برخه وې خوشحاله

تا پاللی ده پښتو او پښتنواله

ستا اشعارو کې ملي آرزو ځلېږي

خدای خبر دی چې به کله حاصلېږی

لوی پيغام دې پښتنو ته دی راوړی

ستا په خيال به چې پښتون کله پوهېږي

تا ويلی لوی درياب ته کوی هڅه

په بېله کې چې نهنگ وي هلاکېږي

ستا وينا ده چې اوښ بار سره راغلی

پښتانه يې غاړکۍ ته خوشحالېږي

د لويانو ارزو وي هر گوره لويه

واړه هر چېرته لږ شی قانع کېږي

لوی سړی وې در سره وو لوی فکرونه

مگر ژر نه راويښېږي ولسونه

ستا ديوان که په ادب کې لوی شهکاردی

تا په توره ټوپک کړی هم ډېر کار دی

څلوېښت زره لښکر ستا د لاس له زوره

لوړی شا په تاتره کې تار په تار دی

دوآبه او دنوښار دکوټ په جنگ کې

د مغل په زړه دې ايښی لوی پرهار دی

د خيبر دره دې سره کړله په وينو

په اهاړ کې دې ليدلی لاله زار دی

خزانې هاتيان استونه که اوښان وو

دغه لويه ولجه ستا دتورې ښکاردی

شجاعت او شهامت در سره مل ؤ

ښه ملگری دې په توره کې ايمل ؤ

تا اخستی له غلېمه انتقام دی

پښتنوته دې گټلی ننگ و نام دی

په هر رنگ کې دې د ننگ خبرې کړی

ملي فکر ستا مرام او ستا پيغام دی

مغلواله دې رټلی ډېره زياته

فرق دې کړی د پردی او د خپل قام دی

غر ورغو کې دې لښکرې ټولولې

غليمانو باندې تا تړلی لام دی

په پښتو باندې له سر او ماله تېروې

ستا له تورې خبر شوی خاص و عام دی

د افغان په ننگ تړلی توره تا وه

در سره لويه آرزو لويه سودا وه