بېګانه

د نا اشنا سترګې ګونګۍ اوښکه یم

رغړم ځلېږمه ورکېږم چرته

لکه د هېرو کیسو ورک نومونه

له زړونو وځمه هېرېږم چرته

د یوه لېرې غره د تیږو تر منځ

یوه غوټۍ یم غوړېدلې یمه

نه د اوربل نه د ګرېوان په تمه

نه د چا سترګو پېژندلې یمه

زه د هستۍ د کهکشان پر لمن

ناپېژندلی نالیدلی ستوری

د یوې لېرې نابلدې درې

په یوه پاڼ باندې لوېدلی سیوری

زه د حیات د اسمانونو څاڅکی

ژوندي دریاب ته را لوېدلی یمه

یوې څپې یوه لحظه اخیستی

وروسته له ځانه پردی شوی یمه

د پردي سیل سره الوتی مرغه

د بل په خوا کې وزرونه وهم

د سوز نارې مې بېګانه دي دلته

ځکه پر خولې باندې مهرونه وهم

زه یوه کیسه د لېوني پر ژبه

د چا غوږو ته رسېدلې یمه

چا مې پر لوري راکتلي نه دي

چا له ناکامه اورېدلې یمه

د نا اشنا سترګې ګونګۍ اوښکه یم

رغړم ځلېږمه ورکېږم چرته

لکه د هېرو کیسو ورک نومونه

له زړونو وځمه هېرېږم چرته