د بهار هر کلی

هر کله راشې تازه بهاره

تا دی راوړی گلان بې شماره

نری شمال دې دم د عيسی دی

سحر چې راشې له جگ کهساره

آب حيات ؤ، ستا بارانونه

تروتازه شول ټول چمنونه

هېواد زمونږ دی شين گلستان کړ

هر طرف ښکاري د گلو غرونه

د بلبل ځاله پاڼه د گل شوه

شاعری برخه نن د بلبل شوه

غنچه د گلو په حقيقت کې

مطلع د شعر روح د غزل شوه

تل دې بهاروي زمونږ وطن کې

لکه چې روح وي ښايسته بدن کې

څانگې د گلو دې تل تازه وي

خزان دې نه وي زمونږ چمن کې