دا چې زه لږ غوندې کم تاته په ناز يم

دا چې زه لږ غوندې کم تاته په ناز يم

اوس ايله خبردار شوی ستا له راز يم

چې نغمې مې ستا په خوښه نه راوځي

دا وراني وايه د چا ده زه خو ساز يم

گوندې خدای مې د مير ښکار په لاس کې ورکړي

باښه گرو بد مزاج کړم گنې باز يم

که څوک غوږ لري هر ځای مې اورېدی شي

د مادې له قيده خلاص هغه اواز يم

په نياز مې غلط مه شه که هوښيار يې

تابه تاوته څرگند کړم هغه ناز يم

ستا رازونه مې ډېر حل کړل خو لا يو شته

زه په خپله د خپل ځان د پاره راز يم

ما حمزه دی ستا محفل په دې موندلی

چې خندا لکه د شمعې په گداز يم