دا د چا د مخ رڼا ده، مخامخ په آيينه کې

دا د چا د مخ رڼا ده، مخامخ په آيينه کې

جوړ نظر لره برېښنا ده، مخامخ په آيينه کې

لاندې باندې ځانته ځير ده، زړه راښکون د حسن گوري

سر تر پايه تمنا ده، مخامخ په آيينه کې

زه يې وليدم که څه دي، په شا نه گوري له شرمه

په سينگار کې وارخطا ده، مخامخ په آيينه کې

که پخپله خپل مثال ده، خو چې خوښ يې خپل مثال و

خپل ښايست ته په خندا ده، مخامخ په آيينه کې

تا چې مخ ورځنې ستون کړ، مرور ترې کاينات شول

د حيرت پاتې دنيا ده، مخامخ په آيينه کې

د جوهر په ملا کې خم خو، ستا بېلتون دی پيدا کړی

دا چپه ددې دريا ده، مخامخ په آيينه کې

زلفې جوړې بيا خورې کا، بيا يې جوړې بيا خورې کا

چې ورپېښه څه سودا ده، مخامخ په آيينه کې

لږې سترگې که کړي پورته، دا هوسۍ به وترهېږي

خو د ځان په تماشا ده، مخامخ په آيينه کې

د حمزه په زړه کې ورک شي که شورونه د کثرت وي

گوره څرنگه چوپيا ده، مخامخ په آيينه کې