د غيرت سندره

مونږ پښتانه يو د غيرت په ځای کښې سر ورکوو

هم مال و زر ورکوو

د ظالمانو جواب هر وخت په خنجر ورکوو

ورته خبر ورکوو

مخ گرځول د جنگ ميدان نه مونږ ته دين نه وايي

ملی آيين نه وايي

مونږ خپلو توروته د سرو وينو جوهر ورکوو

اب د خطر ورکوو

وطن ساتنه حق پالنه وظيفه ده زمونږ

دا فريضه ده زمونږ

د خپلواکۍ درس خپل اولاد ته مکر ورکوو

دغه هنر ورکوو

سر ورکول دخپل ولس د سردارۍ دپاره

د آزادۍ د پاره

د پښتون کار دی ځکه لاس کښې توره سپر ورکوو

زړه زړور ورکوو

تجاوز نه کوو په نورو باداري نه کوو

ستمگاري نه کوو

د ښه سلوک امتحان هر چانه بهتر ورکوو

په وطن سر ورکوو

د آزادۍ دښمن چې هر څوک وي ناښاد دي وي

خوار و برباد دې وي

مونږ د پنجرې اسير مرغه ته بال و پر ورکوو

آزاد وزر ورکوو