د ښکلو خيال

پتنگ په شمع بلبل مينه په سروگلو کوي

عاشقان فخر په ديدار دنازولو کوي

تا په ملالو اشري سترگو زړه وړی زما

دلبران واړه د زړه ښکار په تش کتلو کوي

د هر چا خوښه چې په مال که په کمال پسې ځي

زه يې عبث بولم چې مينه بې د ښکلو کوي

هغه پاک زړه چې دخوبانو خاص حرم باله شي

څوک به يې ولې ځای د هر خيال د ساتلو کوي

د ښکلو خيال که له شاعر سره ملگری نه وي

ډېرغوليدلی که هوس د شعر ويلو کوي

ستا د خيال رڼا کښې ماته حقيقت شو څرگند

فيلسوف خوشې اعتماد په دلايلو کوي

څوک چې له حق او حقيقت سره کړی مينه پيدا

د زړه په حکم فرق د حق او د باطلو کوي