د محيط تاثير

سوزوي مو اوبه هم چې په جوش راشي

اوبه اور شي که محيط يې وي سور اور

په اوار بستر کښې سيند درومي ارامه

خو په چړ کښې يې بيا گوره شروشور

په هر څه کښې د محيط تاثير ته گوره

وي بې زهرو چې اوبو کښې وي منگور

لوگی اورنه دي پيدا خو څوک نه سوزي

د محيط اغيزه کله لري مور

له يوه پښته رڼا او لوگی دواړه

د يوه مخ منور او د بل تور

د مظلوم د زړه د تاو ساړه آهونه

سوزوي د ظالمانو کلی کور

د ظالم عاقبتت خوار دي له هر چا نه

ما ډېر خوار و زار ليدلی ظلم زور

ډېر سپاره مستو اسونو غورځولی

يزيد هم د اقتدار په آس وسپور