د سيند لور

يه د سيند لوري غنم رنګي نجلۍ

مړ ژواندی زړه مي تخنولای نه سې

زه خو د سپينو اننګو مين يم

ته مي احساس راويښولای نه سې

نه دي پر لنډه زنه خال وهلی

نه دي په غاړه امېلونه ښکاري

نه دي خپړي په نکريزو ښکلي

نه دي په پښو کي پايزېبونه ښکاري

نه دي پر شونډو لېونی تبسم

نه دي په سترګو کي رمزونه وينم

نه د نخرو څخه کږه وږه سوې

نه دي د زرکي قدمونه وينم

ته به ښايسته يې لګولي دي دي

د چا د ميني لېوني اورونه

خو زه د غرونو د هوسيو مين

زما يادېږي پښتني نازونه

زه پښتني غېږي لوی کړی يمه

زه پښتني ميني روزلی يمه

زه سپينو غېږو ته لوېدلی يمه

زه سپينو لېچو زنګولی يمه