د عصر دلبره !

ته منظور د هر نظر يې

ته ددې عصر دلبر يې

مبارک شه! مبارک شه!

په خوبانو کښې افسر يې

د الماس تاج دې په سر دی

آراسته په زر، زيور يې

د ښکلا ثاني دې نشته

معطر مشک و عنبر يې

ټول دې تل ثنا صفت کړي

له هرچا څخه بهتر يې

عيب دې څوک ليدلی نشي

سر تر پايه ټول هنر يې

خو شپې ورځې درته وايي

آيا دې نه هم خبر يې

چې ښکلا وي يو څو ورځې

چې پريوزي هغه لمر يې

دا څېره نه پاتې کېږي

که هر څو ښکلی بشر يې

د جگ غره په جگه څوکه

زېړی لمر د مازديگر يې