د وراني وېره وې څه په ودانۍ کې

د وراني وېره وې څه په ودانۍ کې

يو کامل تعبير مې پټ دی په ورانۍ کې

آييننه دې د کرم يم و عالم ته

کړم وينا صفا صفا په حيرانۍ کې

په موسم کې د بهار صفت د گل شي

ښکلي واړه شهرت مومي په ځوانۍ کې

د سېلاب هسې مې عشق مه شه بې آبه

لکه سيند اوسه مدام په روانۍ کې

ته په جمع زړه پرېشان يې زلفوره

ما حاصل کړو جمعيت په پرېشانۍ کې

په ځوانۍ کې د ښايسته وو ديدن گران شي

که گلان شي په بهار په ارزانۍ کې

حمزه! ته ملک او خان په خوی خصلت شه

دا غرض دی ملکۍ او په خانۍ کې