دا يوه پياله زما د وينو بهانه ده

دا يوه پياله زما د وينو بهانه ده

ځار دې د سرو لبو څه شېرينه بهانه ده

بس خو يو آهنگ يې په گنبد کې د وجدان وي

څه ده دا دنيا خو تېره شوې ترانه ده

نمر په غرغره شو د ځوانۍ اوس خو يې واوره

پاتې په لېمو کې مې بې نُوره افسانه ده

يې خو ته هوسه د دنيا د سر پړونی

ما به ترې کړو پورته ولې حيف چې زنانه ده

خدايږو حقيقت د يارانې ته رسېدلي

ما سره هر چا چې جوړه کړې يارانه ده

ما چې پېژندلی محبت له کومه وخته

وخت رانه بوږنېږي ترهېدلې زمانه ده

پرله پسې تا چې حوادث کړه حمزه گپه

بس دا يې کونجې وه هسې ټوله خزانه ده