د زولنو په پرانستو راضي کېدی نه شمه

د زولنو په پرانستو راضي کېدی نه شمه

همدمه بېرته شه له ما چې لېونی نه شمه

په محبت کې اوس اشنا دا څه مقام راغلی

د تصور په سترگوهم درته کتی نه شمه

ای داشنا د پخوانۍ مينې زلمو يادونو

هسې راتگ مو څه پکار دی چې زلمي نه شمه

زه حادثو ته مقابل يم دمردانو په څېر

لکه د پل به شم فنا خو پاڅېدی نه شمه

په محبت کې هسې هېر له خپله ځانه يمه

لکه چې خوب د لېوني رايادېدی نه شمه

ما وته ښکليه په ساړه نظر کتل خو کوې

خو فکر بويه چې دې چرته د زړه سوی نه شمه

زه به دتا نه شرمېدم چې در کتی مې نه شو

اوس چې در گورمه له ځانه شرمېدی نه شمه

د خپل شعور گڼې پردې دي پکې پټ يمه زه

يمه په څو رنگه ظاهر خو پېژندی نه شمه

ستا په ښکلا کې به شامل لکه نمک يمه زه

څو دې که تريو راته تندی وي بېلېدی نه شمه

ستا غلامي قبوله کړې ده بې دامه حمزه

بلادې واخلمه د زلفو خرڅېدی نه شمه