دباغ ونې

يوه باغ کښې وې ولاړې ډېرې ونې

هره پاڼه يې لايق وه د ستاينې

د دوی نيلی يو له بله وې تړلی

غوږ په غوږ يوه چمن کښې اوسېدلې

دغه واړه د يوه دهقان د لاس وې

لکه گوتې د يوه لاس ټيټ وپاس وې

هر يوې بېله مېوه او بېل يې نوم ؤ

رنگ او خوند کښې يې توپير ښکاره معلوم ؤ

مگر دوی لکه د يوگلشن گلونه

يو له بله نژدې کړی وو لاسونه

خوا په خوا غاړه په غاړه خوله په خوله وې

له يوې خاورې پيدا د يوه کاله وې

ددې ټولو يوخزان او يو بهار ؤ

ښه او بد يې وشريک يويې واکدار ؤ

په حقوقو کښې يې نه و څه توپير

باغبان ؤ په هرې ونې ډېر زهير

له يوې ولې اوبه ورته راتللې

په يوه هوا کښې ټولې لوئېدلې

يو له بله يې په هر حال کښې شرکت ؤ

په تمامه معنی يو صحيح ملت ؤ