ديني تبليخ

ټول عالم خبر دی چې خيرات کښې ثوابونه شته

مال کښې د غنيانو دمسکين، فقير خقونه شته

څوک چې ملايانو ته څه ورکړي ډېر اجرونه شته

بې زکاته مال باندې داغل دا ورگوروزنه

دا مسئلې کړی واعظ مونږ ته شا مدام دی

پټ يې چې ساتلی ځينې نور د دين احکام دی

مال کښې د ميراث دخويندو برخې چاليدلی دی

ميل د خورولور ته په واده کښې چا کتلی دی

مونږ ته چا دکونډو باب کښې کله څه ويلی دی

دا رنگ مسئلې مونږ ډېرې لږې اورېدلی دی

ډېر چې په وعظونو کښې يادېږي سخاوت دی

يا په ډېر اخلاص د کوم صاحب مخکښی خدمت دی

وايو ظلم بد دی بيا ظالم سره ملگری يو

ډيرې نارو او وينو ړانده کاڼه او غلی يو

حقه شاهدي پټه ساتوله حقه لرې يو

وېره د خدای نشته زورورنه وېرېدلی يو

څنگه مسلمان يو قرآن څه وايي مونږ څه کوو

داسې عملو سره لا بيا وايو چې ښه کوو

لمونځ مو صحيح نه دی خو نفلونه هرساعت کوو

دين نه خبر نه يو له ريا ډک عبادت کوو

نه کوو عمل په قرآن تل يې تلاوت کوو

سل رنگه گناه خدايږو په رنگ کښې د طاعت کوو

زښت ډېر مهارت لرو په دغسې کارونو کښې

دين راڅخه ورک شو په رسمو او رواجونو کښې

پاته دې اصول د دين خو ټينگ په مستحبويو

کلک يو په سنتو ناخبر له فرايضو يو

کله مکلف د جای نماز په گرځولو يو

اصل کار شو پاته د ظاهر په جوړولو يو

راشی چې د دين واړه احکام په ځان قبو ل کړو

هسې نه چې پاته وي واجب سنت معمول کړو

حق ويل په حق ټينگ درېدل اصلی طاعت گڼه

لاره کښې د خير کوښښ کول لوی عبادت گڼه

دا ته وظيفه د سړيتوب او خلافت گڼه

ظلم ورکول له ملکه دين او عدالت گڼه

سخت وي که اسانه چې دين وايي هغه کار کړه

ورانې کږې لارې کړه او جوړه سمه لار کړه

دا رنگه کارونه د رښتيا مسلماني غواړي

گرانه وظيفه ده ډېره ټينگه دينداري غواړي

حق او حقيقت پالل تقوی ايمانداري غواړي

هر کار کښې دخدای لحاظ د حق طرفداري غواړي

څو رکعاته نفل کول شيخه! دومره گران نه دی

خدای خوشحالول، جنت گټل دومره آسان نه دی