دخان مهرباني

خان ته سر ښکته کول سرگرداني ده

د پښو نه ده د زړونو ستوماني ده

دا دروند پېټۍ چې سر يې گروزمه

سردې وخوري دچنگېز د وخت خاني ده

خربشوی چې ورته وايي پرې اختر شي

په نوکر دخان همدا مهرباني ده

غولول چل او فريب هوښياري بولي

هوښيارۍ کښې پټه شوې شيطاني ده

وايم زه له لوږې مرم ته له مړښته

وايي چوپ شه! دغه برخه اسماني ده

داسلام په نامه څه ظلمونه کېږي

ما ليدلی خانه! ستا مسلماني ده

چې دخوار غريب خدمت ته يې رابولم

وايي کله زما کارپادواني ده

هم زمونږه خدمتگار هم مو بادار دی

دا يوه عملي بله زباني ده

ښه پوهېږم له بل ځايه الهام اخلي

که څه وايم وايي دا بدگماني ده

نه يې فکر ددې ملک نه يې لباس دی

په کاله کښې يې قالينه ايراني ده

چې هر څومره څه لري ټول خارجي دي

بس يوازې تذکره يې افغاني ده