دسیلاب مخه چې  دشګو په بندونو تړي

ژبې اوخولې دملایانو په دمونو تړي

درنځور تبې په ټوټکو خامو تارونو تړې

بل چیرته نشته دلته شته داکرامت پښتونه

چې وران ویجاړ جهان مشرانو ته ودان وښيي

چې طوفانونه، زلزلې آرام جهان وښيي

صادقان تور کړي خاینان  ډیر صادقان وښيي

بل چیرته نشته  دلته شته دامهارت پښتونه

ددین پرده کې چې دعیش عشرت  دنیا کړي پټه

ددنیا ناوې چې خرقه کې  دګدا کړي پټه

نفس پرستي چې په جامه کې دتقوا کړي  پټه

بل چیرته نشته دلته شته دا ریا ضت پښتونه

وي بیسیواده دمکتب معلمي به کوي

لیکل یې نه زده دبیري محرري به کوي

ایشیا یورپ نه پیژني کار سیاسي به کوي

بل چیرته نشته دلته شته دالیاقت پښتونه

یوه زره نقصان په خپل شان کې لیدلې نه شي

هیڅ اعتراض په خپل کار باندې قبلولې نه شي

هر څه چې کړي څوک پکې خو  قدر ویلې نه شي

بل چیرته نشته دلته  شته داسیاست پښتونه