غريبان د فن که سته دی، په پښتو کې غني هم شته

غريبان د فن که سته دی، په پښتو کې غني هم شته

د هوښيارو په ټولي کې لېونی فلسفې هم شته

ما دا خپل هم را خپل نه کړل، له پردو نه څه گيله ده

خپلو خپل مقام که پرېښود، دې مقام ته پردي هم شته

په ظاهر چې درته ښکاري، د هوسۍ غوندې معصومي

خبر نه يې په دې سترگو پښتنو کې زمري هم شته

د چا سر به دا منمه، چې په پښو کې د بادار وي

خو يو څو په پښتونخوا کې، خدايږو سر په تلي هم شته

که مرکب د زمانې دی، سر تر پايه پټ په زغرو

خيبري مزاج ژوندی دی، ذوالفقار دعلي هم شته

چې وي کندې هر دښمن ته يې د برندې شملې گونجې

چې زاړه دي خو زلمي دي، دلته داسې زلمي هم شته

که اغيار کې خوی د سپي وي په دې سيمه کې پړانگان دي

که په شان د سړي راشي، په جواب کې سړي هم شته

دخيبر شډله سيمه، په دې کاڼو مه تېروځه

هم په دې ډبرو، کاڼو کې ځلانده غمي هم شته

که هغه بې وفا يې کا، خو دی ښکلی ور له ښايي

حمزه خپله مينه ځير کړه، په هغې کې کمي هم شته