که نه وی

حق او باطل نه معلومېږي حق بيان که نه وي

ظالم ته هېڅ نشې ويلی ټينگ ايمان که نهوي

پنځو روپو باندې يې ولې هره ورځ خرڅوې

دين و ايمان دې مسلمانه ډېرارزان که نه وي

آه فرياد د چاله لاسه دغه خلق کوي؟

چېرې بې رحمه خدای ناترسه ظالمان که نه وي

دا ميدانو ولې سره دی په سرووينو باندې

په هر هېواد کې شرمښان يا قصابان که نه وی

ولې له ظلم ناروا سره جهاد نه کوی

دا په نفلو باندې ولاړ ريا کاران که نه وی

لکه واړه په څو پيسو باندې غولېږی ولې

په خوی او عقل دا لوی خلق ماشومان که نه وی

ستوری د دين به درته وايمه ملاصاحبه!

دا ريا کاره بې عمله ملايان که نه وی

خوار و غريب او بېنوا که په راحت ؤ پکې

جنت يې بولم خير دی حوری او غلمان که نه وی

چې مظلومان کړي فريادونه د ظالم له لاسه

ورته دوزخ وايه هېڅ اور لړم ماران که نه وی

دانا داری دانادانی دا بدبختی له څه ده؟

زمونږ کارونه زمونږ فکر او خوی وران که نه وی