ښه ده زما مسلمانۍ و پوښته

ښه ده زما مسلمانۍ و پوښته

مخکې زما پښېمانۍ وپوښته

د ديدو ميو دې گرانۍ وپوښته

زما د وينو ارزانۍ وپوښته

ژونده چې تا و ښکلی خوب ليدلی

ورشه تعبير يې له ځوانۍ وپوښته

راشه ناڅاپه، خو يوازې گوری

بيا مې خوشحالې حيرانۍ وپوښته

وايه چې چا دې پرده وساتله

راشه زما له عريانۍ وپوښته

د پرېوتلې پيمانې نه زما

ته د ساقي مهربانۍ وپوښته

داسې په جمع زړه به يې تر کومه؟

ته خو زما پرېشانۍ وپوښته

ډېره خندا د پرېوتو نخښه ده

ورشه د گل سرگردانۍ وپوښته

څه د حمزه د زړه له ورانې خونې

د مينې مسکې ودانۍ وپوښته