ښځه

پوهېږئ ! ښځه څوک ده؟ ضامنه د بقا ده

د ښځې په وجود کښې ماشوم ميندلی ساده

ملگرې د ژوند نه ده منبع د ژوند او روح ده

القاها الی مريم، د خدای حقه وينا ده

ژوندون يې د عالم ژوند د امور د ژوندانه ده

هم مور د مسيحا ده هم خپله مسيحا ده

ښکلا ددې صورت کښې پيدا کړه ډېر رنگونه

په يو رنگ او بل رنگ کښې دخپل مجنون ليلی ده

آدم نه تر دې دمه هر چا ده خوښه کړې

د هر نظر منظوره د هر زړه تمنا ده

چا دلته پيدا کړې څوک ځي پسې جنت ته

ښايسته د جنت حوره بل څوک نه ده همدا ده

دنيا ته چې راغلې اول بابا آدم دی

په څنگ کښې يې ولاړه زمونږ بي بي حوا ده

ملگری د سفر شوه ساره د ابراهيم (ع)

ښايسته ماريه ځانته بللی مصطفی ده

د حسن په قصه کښې دعشق په افسانه کښې

مشهوره په عالم کښې د مصر زليخا ده

فرهاد ته ده شيرينه له هر چا نه رنگينه

وامق ته ډېره ښکلی له هر چا نه عذراده

آدم ته درخانۍ ده موسی ته گلمکۍ

د فتخ خان دپاره چې هر څه ده رابيا ده

په سردې د غم پېټۍ سړيه! که ډېره روندوي

چې ورک دې کړي غمونه د سرو شونډو مسکا ده

توښه ده د خوښيو د راز راز رنگينو

د ژوند هره صحنه کښې ددې د مخ رڼا ده

سوفيا، تايلو هنر کښې عرفان کښې رابعه ده

په جنگ کښې دميوند خو ملاله بې همتا ده

کوتره شوه د صلح سکندر ته رخشانه

د حسن ملکه خو د زړه جهان کښې دا ده

کولی شي چې خوږ کړي يا تريخ کاندی ژوندون

هم ډېر لطيف نسيم دی هم طوفاني هوا ده

کړي سپک د اوږو پېټی سپره شي په اوږو

د عيش آرام بستر دی باعث د نارامتيا ده

سبا ټيکری کښې پټه بيگا بله ډيوه ده

د ورځې مروره د شپې ښه ده پخلا ده

اختر د قربانيو او غواړي قربانۍ

وصال يې کله کله د سر او مال بها ده

د ځو کړې درد سره يې د ځوی زېری ملگری

يا درنگ ساعت ته وير دی يا ډکه خوله خندا ده

په غېږ کښې يې ماشوم خوښ هم پلار د ماشومانو

اولاد ته مربي ده پلرو ته مربا ده