ښکلي د سينگار تبو نيولي مړغېژن دي

ښکلي د سينگار تبو نيولي مړغېژن دي

نن تاوده نبضونه د دنيا د انجمن دي

نن راته ساقي د جام سره کړو نظر داسې

خدای زده چې شراب هغه پخوا وو که دا نن دي

څوک دي په معيار چې به د ښکليو وفا وکا

څوک چې دي رښتيني په دې کار کې ، دروغجن دي

سترگه د نرگس کږه د گل په مقابل شوه

ښکليو چې سيالي د يار د سترگو کړه، لېچن دي

اوس راشه حمزه ته دادی وخت د مينې ياره!

پاتې د اميد يې څه بڅري په خوږلن دي