ښکليو ته هر دم چې بهانه راځي

ښکليو ته هر دم چې بهانه راځي

خدايږو چې يې چاته بهانه راځي

تا چې سبا وکړو سبا نه راځي

راشي په هر چا خو په ما نه راځي

بيا يې نو په بيا دی څه باور پکار

څو ځله بيا وکړي خو بيا نه راځي

ښکليه چې موسکی په ټيټو سترگو شي

هېڅ دې اندازه د ښکلا نه راځي

غواړي چې هر څوک د خوشحالۍ ورځې

چا وې د غم شپې دې په چا نه راځي

ووايه واعظ ته گناه زه کړمه

زور خو يې نېکبخته په تا نه راځي

بس خو يوگوهر د محبت نه غير

نور څه خو هېڅ بې له بها نه راځي

ستا دکږو برندو بڼو دا غشي

هېڅ يې په ويشتو کې خطا نه راځي

خدای دې مَېن ډېر کړه چې ښېرې کوي

هېڅ راته نور چل د دعا نه راځي

بې څه دې تندی دکوڅې برند نه دی

هېڅ پکې نن غږ د گدا نه راځي

هېڅکله ممکن نه وي تيندک د وخت

ستا په تغافل کې خطا نه راځي

عشق دی لکه وخت اوسه حمزه پکې

تل وي په تگ بېرته په شا نه راځي