ښکلې که کوتره وي چې يو ناڅاپه بازه شي

ښکلې که کوتره وي چې يو ناڅاپه بازه شي

بس نو پس له دې نه حقيقي يارانه سازه شي

اوس دې التفات وينم خو سوال دوصال نه کړمه

ښکاري چې تکميل ته مينه ورسي بې نيازه شي

اوس دمينې زړه له هغه کيفه سره خوښ نه دی

خدای زده اشنا ولې؟ چې اوس ډار مې ستا له نازه شي

غږ خو راته وشو اجازت که يکتايي راکا

ډار د جدايۍ مې په جواب له خپل اواز ه شي

ته پخپل مکان کې دومره نور وسعت خو راوله

خير دزړه مارغه مې که بيا پاتې له پروازه شي

خدای زده چې فتور دی دوصال او که چه بل سبب

نن دغيريت جلوه چې ستا له هر اندازه شي

عشقه د حمزه په خوله دې ښه چې مهر وواهه

حسن به بې آب شي که پرده پورته له رازه شي