ښکلا اوهنر

په هر ځای کښې په هر چا کښې چې ښکلا وي

د يورپ د افريقې که د اسيا وي

د نظر خاوند په مينه ورته گوري

مسلمان وي اوکه گبر که ترسا وي

دلته فرق د امريکې او د روس نشته

ښکلی ښه دی ، که دهر سر د دنيا وي

ذوق او مينه او خدای آزاده پيدا کړي

شاعران له قيد او شرطه بې پرواوي

پتنگان ورسره عشق لري هر گوره

د ډيوې ځای که مسجد که کليسا وي

ښه آهنگ چې په هر ساز کښې وي موزون دي

که رباب وي که سپېلۍ وي که دا ريا وي

نندارو او تماشو ته به ورځمه

د هرچا په ساز چې ښکلی په گډا وي

چې په هره ژبه وي ښه شعر ښه دي

که زما وي که د تا که د بل چا وي