خوب د مينې کړې ، بيدار شو زما عمر

خوب د مينې کړې ، بيدار شو زما عمر

بس خو واړه انتظار شو زما عمر

که دمينې د پښو خار شو زما عمر

د ښايست دغاړې هار شو زما عمر

په معنی کې مېن شوی په ماشوم يم

خدايه څنگه بې قرار شو زما عمر

چې ديدن يې اوس د مياشتنې نه په کال کړ

ډېر يې عمر شه، بسيار شو زما عمر

غم د زلفو گرېبان د لېوني کړ

دخپل لاس نه تار په تار شو زما عمر

ښايسته شو لکه زلفې د مهرويو

په ږمنځ دې انتشار شو زما عمر

عاشقۍ مې د فطرت تارونه سُر کړل

سندريز او نغمه يار شو زما عمر

چې کافر د تورو زلفو مې اشنا کړ

ځکه ما لره زنار شو زما عمر

چې د عشق په نقطه نه و بې قرار و

بر قرار شوچې پر کار شو زما عمر

چې مې گام پورته کاوه په لار د وصل

خود فراق لره پيزار شو زما عمر

اوس له ځانه په وعده د يار بېزار شي

حمزه ښکاري چې هوښيار شو زما عمر