کوټوال

هر څه کوي پخپله خوښه د چا کله مني

ځلميه ستا که نه مني د بوډا کله مني

د نوی عصر که هېڅ نه مني او هېڅ نه کوي

د دين احکام او مسئلې د ملا کله مني

خپل فکر ښه گڼي له خپلې رايې نه تېرېږي

اقتضاات دده قانون د شورا کله مني

نفس و شيطان چې ورته هر څه وايي کړي هغسې

د عقل فکر او د علم فتوا کله مني

خپلې کمبلې او شړۍ سره پښې غځول

که هر څه ومني دا رنگه وينا کله مني

ما ورته ويلی دنيا وايي چې قلم ازاد دی

ده وې د عزم خاوندان د دنيا کله مني

زه ورته شپه وايم ته ورځ او دې يوه نه مني

رقيبه ځه چې ځو دې ستا او زما کله مني

چې دعوت ورکړي څوک د حق او عدالت په طرف

وايي پاک نفسه دعوتو نه د چا کله مني

که دې دعوه له خان ملک او له بډای سره شوه

غريبه خوشی ورته مه ژاړه ستا کله مني