لا دې چې په مخ کې زړه راښکون راغلی دی

لا دې چې په مخ کې زړه راښکون راغلی دی

دلته هم په سترگو کې افسون راغلی دی

نن د زړه په سيمه مې راتگ د کوم سپرلي دی

گل غوندې مسکی راته ژوندون راغلی دی

راز به د هستۍ د خوشبويۍ غوندې پرېشان کړم

گل يم په قسمت مې زړه چاودون راغلی دی

گورم چې فرهاد ښکاري نادم په هغه کړليو

بيا چې دويم ځل په بېستون راغلی دی

ستا په نن سبا مې يقين نه و خو رښتيا شو

داسې راته ښکاري جوړ پرون راغلی دی

ښکاري چې تکميل په لېونتوب د عقل کېږي

خاندي زولنو وته مجنون راغلی دی

راغله دوه لاريزه راشه عشقه دادې وخت دی

عقل خو دا وايې چې بېلتون راغلی دی

برند دې ورته وخو کتل تا که قبول نه کړو

ډېر زما نظر درنه ممنون راغلی دی

اوس هغه بې واک موسېدل هم ښکلي نه کا

وخت به ورته نه وايو قارون راغلی دی

سرې د حمزه سترگې د شبگير له زوره نه دي

پوځ د انتظار يې په شبخون راغلی دی