له خدايه سره

خاونده تا په انسانانو کې قومونه کړه جوړ

تا قبيلې شعبې تپې او ملتونه کړه جوړ

د ترک عرب افغان په نوم دې اولسونه کړه جوړ

تاله مرغانو د هوا بېل بېل سيلونه کړه جوړ

ځکه کوترې نه گډېږي کله زاڼو سره

بلبلې نکړي پروازونه له کارغانو سره

په هر هېواد کې دې پيدا کړله بل شانته هوا

حدود معلوم ددې عالم په دريابونو کړه تا

هر يو ملت دې په بل شان بل خوی بل رنگ کړ پيدا

ځينې دې تورځينې دې سپين څوک دی کړه هغه څوک دا

د هر قام زړه کې د خپل قام محبت کښېښوده

تا په فطرت کې د انسان ملي وحدت کښېښوده

د خپل پردي تميز په خټه د انسان کې وينم

دغه شعور دغه احساس په ټول جهان کې وينم

په اسرائيلو دلسوزي ابن عمران کې وينم

ياليت قومی يعلمون ستا په قران کې وينم

چې تا خپل کړی هغه څوک پردی کولی نه شي

د عزيزانو مينه زړونه څوک ايستلی نه شي

قام جوړول د قام پالنه ستا سنت گڼمه

دا تقاضا د طبيعت او د فطرت گڼمه

ستا له طرفه اغيزه د قوميت گڼمه

مينه د قام د انسانانو خاصيت گڼمه

ځکه فرعون سره موسی جگړې جنگونه کړې

د قام د پاره ډېرو خلقو ډېرکارونه کړي

قامونه دی بېل بېل فصلونه د خلقت د کتاب

ده هره نوعه او هر جنس لکه يو فصل او باب

په هر تصنيف او هر تاليف کې وي فصول او ابواب

ددې د پاره پيدا شوی دی فرقې او احزاب

خدايه! ستا صنع ستا سنت په دغه شان وينمه

چې څوک ترکان او څوک عرب او څوک افغان وينمه

قومي صبغه ده ستا له خوا کله تغيير قبلوي

کله يو قام د بل قام ځان باندې تاثير قبلوي

هر څوک خپل فکر خپله رايه خپل تدبير قبلوي

هر قام له خپل قامه وزير اوخپل امير قبلوي

د قام په ژبه تا هر قام ته پيغمبر ولېږه

له خپله قامه دې هر قام لره رهبر ولېږه

که پښتانه هر څومره لرې پښتنونه اوسي

که په زرگونو ميلو لرې دوی هغو نه اوسي

که هغه خواله هسکو غرو او دريابونه اوسي

زړو ته نژدې دی که غايب له نظرونه اوسي

نشته په شرع کې حجاب له خپل محرمه ځنې

ستريه کار دی له پردی او نامحرمه ځنی

دي ظالمان چې پښتانه له پښتنو بېلوي

وروڼه او وروڼو او اولادونه له پلرو و بېلوي

يو اپريدی دی په خيبر کې په تيراه کې اوسي

مومند مومند دی پېښور که سالالا کې اوسي

په قندرهار کې ميرويس او احمدشاه بابا دی

په پېښور کې خوشحال خان ، عبدالرحمن بابا دی

يوشان ښکارېږي پښتنو ته که هغه که دا دی

چې اباسيند اباسيند بولی د دوی يو ابا دی

ورورکه په کور که په لاهوروي پردی کېږي کله

په لرې توب د قرابت سلسله شکېږي کله