لوی افتخار

زمانه ږدي په هغه سر د افتخار تاجونه

چې يې په سروي رسولی ډېر مشکل کارونه

په ډيرې لويې قربانۍ پيدا شي لوی حقونه

خوشې په خوشې هېڅوک نه گټي دارنه نومونه

کارونه ډير دي خو هر کار گوره شهکارنه دی

له خپله سره تېرېدل څه انسان کار نه دی

سرورکول دخپل ولس د سردارۍ د پاره

دا ستبداد اواستعمار د بربادۍ د پاره

د حق گټلو اود خپلې آزادۍ د پاره

د ننگ ناموس د حفاظت او سړلوړۍ دپاره

هغه گران کار دی چې ښاغلي ننگيالي يې کوي

په آزادۍ مين ځوانان او توريالي يې کوي

مري عالمونه هره مړينه افتخار نه دی

د هر چا مرگ د شجاعت او عشق يادگار نه دی

د پتنگ مرگ دمچ مېږی مرگ غوندې خوار نه دي

په هېڅ مذهب کښې برابر حلال مردار نه دی

د منصور مرگ به ستايل کېږي په دنيا کښې مدام

په هر نظرکښې به حقير وي مرگ او ژوند دغلام

په ځان وژلو کښې ژوندون دنام وننگ وينمه

لوی افتخار د آزادۍ د پاره جنگ وينمه

ډېره شانداره کارنامه په هغه د رنگ وينمه

چې د مظلومه لاس دظالم په وينو رنگ وينمه

هلته چې ظلم ، تجاوز ، فرعونيت وي ولاړ

په مقابل کښې يې همت، ننگ و غيرت وي ولاړ

حقيقت تريخ دی مگر زه انکار کولی نشم

جهان مې ويني چې زه ځان قربانولۍ نشم

د پښتنو درانه نومونه ښه ساتلی نشم

د پنجابی مخکښې په برېتو لاس وهلی نشم

ډېر پورته گورم چې د پلار نيکه يادگار ته گورم

ډېر ښکته گورم چې خپل ټيټ ژوند او روزگار ته گورم

اوس له پښتونه دچا ويره د چا ډار نشته

هغه غيرت هغه هيبت هغه وقار نشته

په زروتنو کښې يو تن هم فدا کار نشته

ځکه په حق د پښتنو باندې اقرار نشته

هغه به څه وي چې خپل حق په چا منلی نشي

يا دخپل حق د پاره ځان قربانولی نه شي

په باجوړ باندې راغلی څه بلا وينمه

له باجوړ نه جوړه شوی کربلا وينمه

په پاک نامه ډيره ناپاکه ناروا وينمه

د بل په زور مسته مغروره مارشالا وينمه

د باجوړ په کلي کور که نن بمونه اوري

د باجوړيو په مړانه رحمتو نه اوري

پښتونستان هم اراده داستقلال لري

د مراکش په شان په مخکښې لوی جنجال لري

لکه تونس الجزاير د مظلوم حال لري

هغه مقصد او هغه فکر هغه خيال لري

خو پښتانه په قربانۍ کښې لږ نيمگړۍ وينم

دغه د تيروخت توريالی څه قدر ستړۍ وينم