لوبې کوي

په ږيره د بابا اوس ماشومان لوبې کوي

خپه يم په مشرانو چې کشران لوبې کوي

په مدحه په ستايلو په بوټونو پاکولو

دا خلق نن سبا په والا شان لوبې کوي

چې هر طرف يې بيايی په هماغه طرف درومي

په ځينو کاردارانو در باريان لوبې کوي

سپاره يې په اوږو شوه چې په دې فن کې استادو

واړه په لويو باندې دغه شان لوبې کوي

حاکمه خبرنه يې تا ته څوک نشي ويلی

په تا باندې څو تنه ملکان لوبې کوي

چې ساتي بيزوگان او ټوله ورځ شادي بازي کا

ډېر ښه دی تر هغو چې په انسان لوبې کوي

که هرڅه دې زړه غواړی هغه کېږي چې پيسې وي

رشوت په رشوت خور باندې هر شان لوبې کوي

ما وليد مردار خوردی جگ مقام ته رسېدلی

د ستور نشان يې واخيست په ډېران لوبې کوي

د سپور قدر زياتېږي په هغه ځای کې هر گوره

چې تل يې په چرگانو گيدړان لوبې کوي

د غلو ملگری کېږي هغه وخت کې تمام خلق

د شاه په رعيت چې حاکمان لوبې کوي

هر څه هلته بل شان وي حقيقت نه معلومېږي

په سترگو او نظر چې مداريان لوبې کوي

جوړېږي نه هېڅکله خود مرگ تر ورځې پوې

زمونږ په رنځورانو پساريان لوبې کوي

دمچ مېږي کارنه دی چې په سره اور ځان ستي کا

په بلو لمبو باندې پتنگان لوبې کوي